Свет

Правакацыя з вялікай колькасцю ахвяр і абвінавачваннем Украіны. Стала вядома, якую правакацыю рыхтавалі на польска-расійскай мяжы

Расійскія спецслужбы планавалі аперацыю з вялікай колькасцю ахвяр, піша Rzeczpospolita. 

Польскі вайсковец на мяжы Польшчы з Расіяй каля ўмацаванняў «Усходні шчыт», архіўнае фота. Фота: Marek Antoni Iwanczuk / SOPA Images / LightRocket via Getty Images

Расійскую аперацыю рыхтавалі на канец кастрычніка — пачатак лістапада, паведамляе Rzeczpospolita. Газета спасылаецца на высокапастаўленых суразмоўцаў, звязаных з сілавымі структурамі і знаёмых з падрабязнасцямі польскай прэвентыўнай аперацыі.

Паводле іх, план прадугледжваў дыверсію на польскай тэрыторыі паблізу мяжы, магчымае перасячэнне мяжы і інсцэніраваны напад на аб’ект у самой Расіі. Адказнасць за гэта хацелі ўскласці на Украіну.

«У нас была інфармацыя пра канкрэтныя аб’екты, дзе мусіў адбыцца напад. Расіяне разлічвалі на вялікую колькасць ахвяр», — сказаў адзін з суразмоўцаў.

Якія менавіта аб’екты маглі стаць цэлямі, ён не раскрыў.

Іншая крыніца параўнала задуму з Глівіцкай правакацыяй 1939 года, калі нацысты інсцэніравалі напад на нямецкую радыёстанцыю, каб абвінаваціць у ім Польшчу.

«Гэта мусіла нагадваць нешта кшталту Глівіцкай правакацыі. Вядома, тых, хто перасёк бы мяжу, найхутчэй застрэлілі б або знайшлі б пры іх доказы таго, што яны з Украіны. Мэтай было спыненне дапамогі Украіне», — патлумачыў суразмоўца газеты.

Хто мусіў выканаць аперацыю, дакладна невядома. Выданне піша, што гэта маглі быць, напрыклад, грамадзяне Украіны, якія жывуць у Польшчы, або людзі, прывезеныя з іншай краіны.

Папярэджанне пра пагрозу паступіла ад партнёрскіх спецслужбаў. На магчымасць правакацыі ўказвалі і польскія аналітыкі. Яшчэ адным трывожным сігналам, паводле крыніц газеты, стала з’яўленне з расійскага боку афіцэраў спецслужбаў, якія каардынуюць дыверсійныя дзеянні.

У адказ Польшча ўзмацніла ахову мяжы. У памежныя раёны накіравалі паліцэйскіх з іншых рэгіёнаў і дадатковых супрацоўнікаў Агенцтва ўнутранай бяспекі. Узмацнілі падраздзяленні памежнай аховы.

У Вармінска-Мазурскім ваяводстве арганізавалі вучэнні спецвойскаў. Туды таксама накіравалі элітныя баявыя групы спецпадраздзяленняў GROM, NIL і AGAT, у тым ліку з беспілотнікамі.

«Мэтай было стрымліванне, але таксама патэнцыйныя дзеянні на апярэджанне», — сказаў чалавек, знаёмы з падрабязнасцямі аперацыі.

Каардынатар польскіх спецслужбаў Томаш Сямоняк пацвердзіў, што пагрозу ацанілі як рэальную, а на мяжы дзейнічалі памежнікі, паліцыя і войска.

«Калі мы зрабілі пэўныя крокі, то таму, што палічылі: існуе рэальная пагроза», — заявіў ён.

Аднак публічна пацвярджаць канкрэтны сцэнар нападу з вялікай колькасцю ахвяр міністр не стаў.

«Нават калі ў нас ёсць такая інфармацыя, мы ёю не дзелімся. Мы можам рабіць гэта ў выпадку фактаў, калі нешта адбылося або было прадухілена. Астатняе — пэўная форма спекуляцыі», — сказаў Сямоняк.

Паводле звестак Rzeczpospolita, падобныя папярэджанні атрымалі таксама спецслужбы Літвы, Латвіі і Эстоніі.

Каментары

Цяпер чытаюць

Ці пагражае Крыму блакада праз паралізаваны Крымскі мост?16

Ці пагражае Крыму блакада праз паралізаваны Крымскі мост?

Усе навіны →
Усе навіны

«Тры шэрагі зніклі за долю секунды». Беларусы зноў не могуць патрапіць на навагоднія шоу ў цырку

Зяленскі, а таксама ў Крамлі пракаментавалі ўдар па Крымскім мосце9

«У цябе апошні дзень». Беларускі айцішнік перабраўся на Філіпіны, а там усё жорстка13

«Настаў час крыху адступіць». Сабаленка расказала, што заставалася за кадрам яе няўдалага сезона4

Ізраіль загрузіў мільёны фотаздымкаў у сістэму распазнавання твараў Amazon, каб сачыць за палесцінцамі7

У МУС расказалі, колькі працоўных мігрантаў прыехала ў Беларусь і колькі злачынстваў яны здзейснілі1

Як у кіно. У цэнтры Гродна 19‑гадовы хлопец з аднаго ўдару паваліў слуп13

Свет на парозе фінансавага абвалу, яшчэ больш агрэсіўны Трамп і небяспека для Тайваня. The Economist даў прагноз на 2027 год13

Жанчыне, якая арганізавала ў Мінску незалежную культурную прастору, далі пяць гадоў калоніі18

больш чытаных навін
больш лайканых навін

Ці пагражае Крыму блакада праз паралізаваны Крымскі мост?16

Ці пагражае Крыму блакада праз паралізаваны Крымскі мост?

Галоўнае
Усе навіны →

Заўвага:

 

 

 

 

Закрыць Паведаміць