Грамадства2323

Новы вобраз Міхалка. Як прайшоў канцэрт «Ляпіса Трубяцкога» ў Берліне

У Берліне прайшоў канцэрт гурта «Ляпіс Трубяцкой». Падчас выступу 54‑гадовы Сяргей Міхалок мала размаўляў з публікай і быў не самым энергічным музыкам на сцэне. Тое, як Міхалок змяніўся, заўважаюць многія. Як прайшоў канцэрт — у рэпартажы DW.

Сяргей Міхалок не дае інтэрв'ю, пра яго жыццё зараз мала што вядома. Фота: DW

«Артысты таксама людзі, і ім бывае цяжка, як і астатнім»

Вечар пятніцы, 13 лістапада, берлінскі клуб на беразе Шпрэе. Ужо за гадзіну да канцэрта каля ўвахода — невялікая чарга, а каля сцэны збіраецца некалькі дзясяткаў чалавек. У зале гучыць музыка «Ляпіса», і некаторыя пачынаюць пад яе танцаваць.

«Ау-у-у, ау-у-у, ау-у-у», — даносіцца з дынамікаў. «Я тебя все равно найду-у-у», — нехта гучна спявае ў зале.

Напэўна, не раз гэтак жа рабіла Алена з Украіны. Яна называе сябе «не самай вялікай фанаткай», але пры гэтым часта слухае музыку гурта ў машыне. Упершыню на канцэрце «Ляпіса» дзяўчына пабывала толькі летась — і вось разам з мужам Паўлам прыйшла зноў.

«Слухаю іх з 2014 года. У той момант музыка Міхалка супала з важным перыядам у маім жыцці: пасля дэкрэтнага адпачынку я вярталася ў прафесійны спорт, і «Воины света» сталі для мяне вялікай падтрымкай», — расказвае Алена.

Калісьці гэтая песня стала неафіцыйным гімнам і для мільёнаў жыхароў Украіны, якія падтрымалі Рэвалюцыю годнасці. Яе падтрымаў і сам Сяргей Міхалок.

Муж Алены Павел больш стрымана ставіцца да цяперашняга «Ляпіса Трубяцкога»: мінулы канцэрт яму зусім не спадабаўся.

«Хлопцы з гурта былі актыўнымі, а Сяргей увогуле не праяўляў энтузіязму. У 2014‑м я быў на фестывалі «Атлас» у Кіеве — там ён запальваў стадыён, чытаў вершы. На мінулым канцэрце ў Берліне не было ні вершаў, ні драйву, нібыта ўсё гэта яму ў цяжар. Хаця чаго хацець? Усе мы сталеем, мяняемся, гэта нармальна», — падсумоўвае Павел.

«Вайна, эміграцыя — гэта невесела. Артысты таксама людзі, і ім бывае цяжка, як і астатнім», — заступаецца за Сяргея Міхалка Алена.

Саша і Каця таксама з Украіны, з Кіева. Саша слухае «Ляпіса» «во-о-ось з такога ўзросту» — мужчына паказвае рукой на ўзроўні пояса.

З гуртом у яго звязаныя цёплыя ўспаміны з дзяцінства: як ён хадзіў з мамай на рынак і ўпрошваў купіць касету «Ляпіса Трубяцкога». Мама не лічыла гэтую пакупку неабходнай, але ўсё ж пагадзілася.

«Ведалі б вы, колькі разоў я перамотваў яе алоўкам туды-сюды!» — смяецца Саша.

У 2014‑м муж і жонка былі на апошнім канцэрце ў Кіеве перад тым, як Сяргей Міхалок абвясціў, што гурт «Ляпіс Трубяцкой» спыняе існаванне. Пасля гэтага музыкант стварыў праект Brutto.

«А цяпер, бачыце, вярнуўся. Цікава, як гэта будзе», — гаворыць мужчына.

Як дыскатэка ў летнім лагеры

«Вы толькі нашы імёны не пішыце», — смяюцца трое маладых людзей, якія нядаўна пераехалі з Беларусі ў Германію і спадзяюцца, што змогуць час ад часу вяртацца дадому.

На канцэрце «Ляпіса Трубяцкога» яны ўпершыню: кажуць, убачылі афішу і вырашылі прыйсці, бо дома такой магчымасці — убачыць і пачуць музыкаў гурта — у іх даўно няма.

Доўгі час выступы Сяргея Міхалка былі пад забаронай у Беларусі: у «чорныя спісы» ён трапіў у 2011 годзе пасля таго, як асудзіў разгон пратэснай акцыі супраць сфальсіфікаваных прэзідэнцкіх выбараў 2010 года.

Вярнуцца на сцэну ў Беларусі ён змог толькі ў 2016-м. У 2020-м, пасля падаўлення самых масавых пратэстаў у гісторыі краіны, Міхалок зноў апынуўся пад забаронай.

Фота: DW

«Калісьці слухалі гэтую музыку на дыскатэках у летніх лагерах. Нам падабаецца і рок-музыка, і рамансы Міхалка. Проста хочацца паслухаць любімыя песні, пабыць сярод беларусаў і ўкраінцаў. Гэта ўвогуле прыемна — быць сярод сваіх», — дзеляцца маладыя людзі.

Тым часам у зале гучыць «Украду тебя, украду ночью, увезу тебя, увезу в Сочи» — і публіка пачынае скандаваць «Ля-піс».

Многія танцуюць. Над галовамі вісіць дыскатэчны шар, і ўсё, што адбываецца, нагадвае дыскатэку ў летнім лагеры, толькі цяпер амаль усе прысутныя могуць легальна купляць піва ў бары, а некаторыя прыйшлі не проста парамі — ужо з дзецьмі.

«Ну што, дзяцінства пачалося?»

Канцэрт запланаваны на 20:00, гурт выходзіць на сцэну ў 20:27.

«Прывітанне, Берлін! Рады сустрэчы. Спадзяюся, вечар будзе цёплым і душэўным», — вітае сваіх прыхільнікаў Сяргей Міхалок. За ўвесь канцэрт гэта будзе адно з самых доўгіх яго выказванняў.

Пара песень — і людзі каля сцэны пачынаюць танцаваць.

«Брава!» — крычаць з залы.

«Вялікі дзякуй», — адказвае Міхалок.

Сам Сяргей рухаецца на сцэне даволі стрымана.

Што цяпер адбываецца ў жыцці музыканта, невядома: на кантакт з журналістамі ён не ідзе, на запыты аб інтэрв'ю яго прэс-служба не адказвае.

Пра некаторыя падрабязнасці яго жыцця стала вядома з інтэрв'ю былой жонкі Міхалка Святланы Зелянкоўскай выданню «Наша Ніва». Яна расказала, што ў 2022 годзе пара развялася пасля 14 гадоў сумеснага жыцця.

Паводле яе слоў, на 2024 год музыкант жыў у Эстоніі. Іх траіх агульных дзяцей забраў да сябе Сяргей Міхалок. Былая жонка магла размаўляць з імі праз новую жонку музыканта.

Не каментаваў Сяргей Міхалок і прысуд, які нядаўна яму завочна вынеслі ў Беларусі, — чатыры гады калоніі за «публічную абразу Лукашэнкі» і «распальванне сацыяльнай варожасці».

Тым часам Сяргей Міхалок пераходзіць да песень па-беларуску. Многія яму падпяваюць — так высвятляецца, што на канцэрт прыйшлі не толькі ўкраінцы. Сустракаюцца тут і расіяне, і ўраджэнцы Казахстана.

«Дзякуй», — гаворыць Міхалок удзячнай зале.

«Жыве Беларусь!» — пачынае крычаць нехта ў натоўпе. Міхалок гэты парыў не падтрымлівае і зацягвае песню «Грай». Менавіта зацягвае: манера выканання музыканта, здаецца, крыху змянілася.

Фота: DW

«Ну што, дзяцінства пачалося?» — кажуць адзін аднаму мужчыны побач, калі чуюць першыя словы песні «Ау». Многія падымаюць тэлефоны і пачынаюць здымаць відэа.

Праз гадзіну і пяць хвілін Сяргей Міхалок развітваецца з залай.

«Дзякуй, сябры! Як хутка праляцеў час!» — гаворыць ён.

У 2023 годзе на канцэрце ў Берліне гурт так і не выйшаў на біс, як ні прасіла зала. Гэтым разам «Ляпісы» выканалі яшчэ дзве песні — «Евпаторию» і «В платье белом».

«Вялікі дзякуй, сябры! Гэта быў гурт «Ляпіс Трубяцкой». Да новых сустрэч, будзьце шчаслівыя. Да пабачэння!» — манера зносін Сяргея з публікай, здаецца, таксама змянілася.

«Крычаць «Жыве Беларусь» на пятым годзе вайны не зусім адэкватна»

Пасля канцэрта і, верагодна, некалькіх куфляў піва многія становяцца больш гаваркімі.

Жэню, напрыклад, — 45 гадоў. Падчас канцэрта ён падпявае ўсім без выключэння песням.

Гэта ўжо яго чацвёрты канцэрт «Ляпісаў»: быў у Гродне і Мінску ў 2000-х, пасля — у Тэль-Авіве ў 2010‑х і ў Берліне ў 2020-х.

З гуртом у Жэні звязаныя цёплыя ўспаміны і настальгія па маладосці: ён працаваў важатым у дзіцячым лагеры і ўжо тады «прывучаў дзяцей да правільнай музыкі».

«Як вам новы вобраз музыканта Сяргея Міхалка?» — цікавіцца DW.

«Ва ўсіх бывае рознае ў жыцці. Сярога малайчына. Відаць, што яму было цяжкавата, але ў цэлым — колькі яму гадоў? 54? Ды вы што. Ён малайчына. Шкада толькі, што вершы не чытаў, як гэта было раней».

Гэтым разам Сяргей Міхалок практычна не размаўляў з залай, хоць раней актыўна гэта рабіў, як і выказваў сваю пазіцыю.

Фота: DW

Ці важная яго прыхільнікам палітычная пазіцыя музыканта — ці гэта другаснае?

«Крычаць «Жыве Беларусь» на пятым годзе вайны ва Украіне — на мой погляд, гэта крыху неадэкватна. Калі б гэта быў 2020‑ы ці 2021‑ы — разумею. А цяпер… Мне, вядома, больш падабаўся дзёрзкі Сяргей, але і тое, што я ўбачыў сёння, — выдатна. Магчыма, таму, што ў мяне былі нізкія чаканні, а канцэрт іх усе перасягнуў. Мне здаецца, Міхалок з гуртом Brutto мог бы быць Максам Каржом для пакалення 35+, аб'ядноўваць і ўкраінцаў, і беларусаў, і расіян. Але ён выбірае тое, што ёсць. Разумею, што гэты тур і канцэрты хутчэй для таго, каб проста зарабіць. Але — як ёсць. Я ўсё роўна атрымаў вялікае задавальненне», — гаворыць Жэня.

«З узростам у чалавека мяняецца манера падаваць сябе»

Міры і Алегу нядаўна споўнілася 20 гадоў, яны з Украіны.

«Нарэшце дараслі, каб купіць білеты», — жартуюць маладыя людзі.

Музыку Міхалка яны слухаюць з дзяцінства, і палітычная пазіцыя Міхалка ім, наадварот, важная.

«З узростам у чалавека мяняецца манера падаваць сябе. Магчыма, тое, што было раней, — гэта было клішэ. Самае галоўнае — яго пазіцыя адносна палітыкі Расіі не мяняецца. Я ведаю Міхалка пасля 2014 года, пасля песні «Воины света», і мне яго палітычная пазіцыя важная», — гаворыць Міра.

Алег адзначае, што на канцэрце Сяргей Міхалок рабіў уражанне стомленага чалавека.

Алена выглядае натхнёнай і сама пачынае размову.

«Вельмі класна, нават лепш, чым мінулым разам. Былі песні, якіх я вельмі чакала. І па-беларуску! У нас суседзі беларусы, я ім нават відэапаведамленні запісала.

Мне здалося, Сяргею была важная падтрымка, ён пастаянна дзякаваў публіцы. Можна быць у яме, але калі людзі ўсё роўна на тваім баку, гэта вельмі натхняе», — дзеліцца дзяўчына.

Да канца вечара, аднак, не ўсе захоўваюць цвярозасць розуму і цела.

«Як вам канцэрт?» — спытала карэспандэнтка DW у мужчыны ў чарзе ў гардэроб, перш чым заўважыць, што з алкаголем у гэты вечар ён перабраў.

«Нядрэнна, але хацелася б, каб Сяргей больш аддаваўся зале. Зносін з публікай было нуль. І адчуванне, што многія песні ён проста не хацеў выконваць, але быў вымушаны», — выказвае цвярозыя думкі прыхільнік «Ляпіса».

На гэтым і развіталіся.

Каментары23

  • Зорачкі
    16.11.2026
    Міхалок быў першым, хто распазнаў грантавую мульку, якую нам падсунулі ў 2020-м. Трэба было слухаць тады, калі ён казаў. Зразумела, зараз яму шжо няма чаго казаць, бо сорамна і балюча.
  • ау-у-у
    16.11.2026
    навошта дзяцей у жонкі забраў?
  • капітал
    16.11.2026
    Зорачкі, а вы, стала быць, не за гранты, а за бюджэтныя грошы каменты строчыце? Нядрэнна прыстроілісь.

Цяпер чытаюць

На канцэрт Кадышавай у Мінску ў какошніках прыйшлі нават мужчыны80

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

Аргазм ёсць, а спермы няма. Што такое рэтраградная эякуляцыя і чым яна небяспечная11

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны80

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць