Грамадства

«Людзі рынуліся ў крамы па ваду, у выніку быў часовы яе дэфіцыт». Беларусы расказваюць пра тое, як польскія ўлады змагаюцца з паводкай

Паводка закранула адразу некалькі краін Цэнтральнай Еўропы, сярод якіх Польшча, куды пасьля 2020 году пераехалі сотні тысяч беларусаў. Радыё Свабода пагаварыла з імі пра тое, што цяпер адбываецца ў краіне і як палякі рэагуюць на стыхію.

Фота: Aleksander Kalka/NurPhoto via Getty Images

На тыдні моцныя ліўні прывялі да паводкі адразу ў некалькіх эўрапейскіх гарадах. Найбольш цярпяць Чэхія, Славаччына, Румынія, Аўстрыя і Польшча. У апошняй найбольш пацярпелі жыхары паўднёва-заходняй часткі краіны. Шмат гарадоў і вёсак стыхія літаральна зьнішчыла: Глухалазы, Клодзку, Лёндэк-Здруй. Улады заяўляюць пра мільёны злотых стратаў, на аднаўленьне пашкоджанай інфраструктуры спатрэбіцца некалькі гадоў.

Пад’ём узроўню вады ў рацэ Одра ў чацьвер 19 верасьня дайшоў да Ўроцлава, дзе жыве шмат беларусаў.

У горадзе закрылі для руху некаторыя масты і вуліцы. У барацьбу са стыхіяй уцягнутыя 16 тысяч вайскоўцаў. Па інфармацыі на ранак пятніцы 20 верасьня, гарадзкая сыстэма Ўроцлава вытрымала кульмінацыйную хвалю ў ноч з 19 на 20 верасьня.

Міністэрства абароны Польшчы ад панядзелку пачынае апэрацыю «Фэнікс». Яе мэты — бясьпека, здароўе, мэдыцынская дапамога, у тым ліку з удзелам верталётаў, мабільнасьць — адбудаваньне дарог і мастоў, лягістыка — вада, харчы.

Белы сьцяг — для эвакуацыі, чырвоны — для лекаў, сіні — патрэба ў вадзе

Беларуска Анастасія Сасыкбаева жыве ва Ўроцлаве з 2021 году. Яна расказвае, што цяпер сытуацыя ў горадзе трывожная, аднак Анастасія лічыць, што горад падрыхтаваны да «вялікай вады». Хаця інцыдэнты ўсё ж здараюцца: некалькі дзён таму хтосьці запусьціў чуткі, што вада з крана больш не прыдатная да спажываньня. Гэта выклікала рэакцыю.

«Людзі рынуліся ў крамы па ваду, у выніку быў часовы яе дэфіцыт. Я ў пяці крамах не знайшла вады. Але назаўтра завезьлі», — расказвае суразмоўца.

Па назіраньнях Анастасіі, у горадзе шмат вайскоўцаў і валянтэраў. Людзям раздаюць мяшкі і пясок, каб яны маглі самастойна ўмацаваць жытло і падвалы. Па словах суразмоўцы, на чалавека даюць 20 мяхоў пяску. Яна таксама брала і разам з суседзямі ўмацоўвала падвал у шматкватэрным доме.

Анастасія расказвае, што людзі актыўна ўключыліся і дапамагаюць камунальным службам. Шмат гараджан прыйшлі на ўмацаваньне мясцовага заапарку. Яна таксама кажа, што справіцца з панікай дапамагае пастаяннае інфармаваньне з боку ўладаў. Людзям расказваюць, што купіць, чым запасацца і іншае. Напрыклад, гарадзкія ўлады паінфармавалі, што ў выпадку браку пітной вады трэба вывесіць у акно што-небудзь блакітнае ці сіняе; калі патрабуецца эвакуацыя — белае, калі лекі — чырвонае.

«Там лятаюць верталёты і адсочваюць сытуацыю, усё пільнуюць. Параўнаньні — няўдзячная рэч. Але ўсё-такі ў параўнаньні зь Беларусьсю я пачуваюся як чалавек, пра якога клапоцяцца. Адчуваю сябе трывожна, але ў бясьпецы», — зазначыла Анастасія.

Ганна (імя зьмененае па просьбе суразмоўцы. — РС) жыве ў Еленяй Гуры на паўднёвым захадзе Польшчы. Горад таксама трапіў пад паводку, але цяпер вада ўжо сышла. Яна кажа, што, у прынцыпе, мясцовыя ўлады былі гатовыя да паводкі — спускалі вадасховішчы, адкрывалі дамбы і падрыхтавалі пясок.

У горадзе былі праблемы з вадой з цэнтральнага водаправоду — яе нельга было піць і нават для бытавых патрэбаў варта было кіпяціць. Але цяпер, кажа Ганна, сытуацыя нармалізавалася. У садках і школах некалькі дзён не праводзілася заняткаў. У школах разьмясьцілі людзей, якіх эвакуавалі з затопленых гарадоў.

Беларуска дадала, што ўлады казалі раней пра неабходнасьць будаваць дадатковыя вадасховішчы, але мясцовыя жыхары былі супраць, бо трэба пад гэта затапіць палі і іншыя землі.

«Можа быць, цяперашняя паводка паўплывае на тое, што іх усё ж пабудуюць», — зазначыла Ганна.

Каментары

Цяпер чытаюць

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча12

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча

Усе навіны →
Усе навіны

Падчас расійскага ўдару па Львове там была беларуская дэлегацыя5

«Людзі п'юць з балота». Лукашэнка абурыўся якасцю вады ў Смаргоні4

Філасофскія гурткі, «вышэйшыя сілы», платныя курсы, пашпарт грамадзяніна Метагалактыкі — раскрыта дзейнасць секты4

Жыццё па падпісцы. У «Паўночным Беразе» скардзяцца на платную падпіску, патрэбную, каб карыстацца ўсімі функцыямі жыллёвага комплексу13

З'явіўся новы спадарожнікавы здымак пашкоджанняў Керчанскага моста6

Цыганкоў: Рост аўтсайдарства мужчын, іх сыход у парнаграфію і анлайн-гульні — новая праблема чалавецтва66

«Шмат плацяжоў было ў Польшчы». Беларусы масава скардзяцца на блакаванне банкаўскіх картак9

На «Яндэкс Картах» з'явіліся маршруты па Мінску, дзе ёсць пад'ёмнікі і пандусы

Колькі зарабляюць кур'еры на аўто ў дастаўцы «Яндэкс» у Беларусі4

больш чытаных навін
больш лайканых навін

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча12

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча

Галоўнае
Усе навіны →

Заўвага:

 

 

 

 

Закрыць Паведаміць