Вайна33

«Мы вярнуліся з пекла». Людзі з Алешак прыбылі ва Украіну і дзеляцца эмоцыямі

Украінцы з Алешак перасеклі беларуска-украінскую граніцу на Чарнігаўшчыне. Іх вывезлі падчас гуманітарнай місіі з акупаванага расіянамі горада напярэдадні. Спачатку іх везлі аўтобусамі да расійскай Анапы, адтуль самалётамі — да Беларусі, а потым — аўтобусамі да Украіны, піша Украінская служба Бі-бі-сі.

Людзі з акупаваных Алешак прыехалі ва Украіну праз Расію і Беларусь

Першыя словы і эмоцыі

«Мы вельмі хацелі, каб Украіна ў Алешкі прыйшла, а не мы сюды ехалі. Там было вельмі страшна… Мы вярнуліся з пекла», — расказвае Бі-бі-сі Вольга, якая толькі што выйшла з аўтобуса.

Першымі да ўкраінскай мяжы прывезлі хатніх жывёл, якіх людзі забралі з сабой з Алешак. Далей прыехалі аўтобусы з людзьмі.

У сацсетках з'яўляюцца кадры, як людзей перасаджваюць у аўтобусы і ў машыны хуткай дапамогі. Сярод эвакуяваных шмат людзей сталага веку, ляжачых хворых. На мяжы сабраліся родныя, якія чакалі людзей з Алешак.

Прэзідэнт Украіны Уладзімір Зяленскі выказаў спадзяванне, што гуманітарны доступ да горада застанецца і людзі там змогуць атрымліваць дапамогу.

Ён адзначыў, што такая аперацыя ратавання стала магчымая ў тым ліку дзякуючы таму, што пра гуманітарную катастрофу ў Алешках шмат пісалі.

«Калі ёсць увага свету, ёсць ратаванне людзей. Патрэбныя і наступныя дээскалацыйныя крокі ды рэальнае набліжэнне міру», — сказаў Зяленскі.

Фота: Genya Savilov / AFP via Getty Images

Ні Масква, ні Кіеў пакуль што не паведамляюць, колькі людзей выехала ў тую ці іншую краіну.

Фота: ВВС

«Там няма куды вяртацца»

Вольга расказала Бі-бі-сі, што вырашыла выязджаць, бо ў Алешках ужо было немагчыма заставацца праз пастаянныя абстрэлы, разбурэнні, нястачу ежы.

«Мы баяліся за свае жыцці. Там было немагчыма нават як след нармальна пахаваць чалавека. Я не хачу кагосьці хаваць у сябе на агародзе», — расказала жанчына.

Пры гэтым, паводле яе слоў, шмат людзей яшчэ засталося ў горадзе.

«Мне адначасова і радасна, і трывожна. Бо там яшчэ людзі засталіся, за якіх мы таксама перажываем. Яны нас пыталіся — вы вернецеся? А мне здаецца, што там ужо не будзе куды вяртацца. Там такія вялікія разбурэнні. Там няма куды вяртацца», — расказала Вольга.

Фота: ВВС

Вольга расказала, што ў Алешках людзі ездзілі па прадукты 18 кіламетраў па мінах.

«Людзі падрываліся, калечыліся, гінулі дзеля таго, каб выжыць. А тыя, хто не рызыкаваў ехаць, елі траву. Вельмі шмат людзей галадалі», — узгадвае жанчына.

На мяжы Украіны з Беларуссю эвакуяваных чакалі родныя і знаёмыя. Людзі плакалі пры сустрэчы.

«Дзякуй, што ўдалося забраць нашага тату. Мы шчаслівыя, што яму ўдалося выехаць», — кажа Бі-бі-сі адна з жанчын, якая чакала бацьку.

«Першае, што зраблю — гэта пачну шукаць працу. Любую працу, каб пракарміць сваю сям'ю. Я працы не баюся — капаць, саджаць, будаваць», — расказаў Міхаіл, які толькі што выехаў з Алешак.

Ён кажа, што доўга не выязджаў, бо спадзяваўся, што Алешкі вернуцца пад украінскі кантроль.

Што з людзьмі, якія захацелі выехаць у Расію

Жыхароў Алешак, якія выказалі жаданне эвакуявацца ў Расію, спачатку размясцілі ў пункце часовага знаходжання ў акупаваным Сімферопалі.

«Для іх падрыхтавалі пакоі і гарачае харчаванне. Побач працуюць медыкі, псіхолагі і валанцёры. Дактары праводзяць агляды і неабходныя абследаванні», — паведаміла ўпаўнаважаная па правах чалавека ў Расіі Яна Лантратава.

Фота: t.me/lantratovadobro

Раней памочнік міністра аховы здароўя Расіі Аляксей Кузняцоў паведаміў, што некалькіх жыхароў Алешак накіравалі ў бальніцы Сімферопаля.

На відэа, апублікаваным Лантратавай, бачна, што прынамсі частку жыхароў размясцілі ў гатэлі «Таўрыя». Некаторыя жыхары Алешак выехалі разам са сваімі хатнімі жывёламі.

Эвакуяваныя людзі прыбылі ў Сімферопаль у анексаваным Крыме ўвечары ў пятніцу, 30 кастрычніка.

Доўгая дарога дадому

У сацсетках з'явіліся кадры, як людзям дапамагаюць выйсці з самалёта. Фота: Telegram / Kovalenko

Зранку ў суботу чатыры самалёты з эвакуяванымі ўкраінцамі з Алешак прызямліліся ў беларускім Гомелі.

У сацсетках ёсць кадры, як людзям дапамагаюць выйсці з самалёта. На відэа бачна шмат клетак і пераносак з хатнімі жывёламі.

Людзі прыляцелі ў Гомель з расійскага горада Анапа. Міністэрства абароны Расіі паведамляла, што жыхары Алешак ляцелі з Анапы самалётамі Паветрана-касмічных сіл Расіі.

Туды з Алешак яны дабраліся на аўтобусах.

Напярэдадні ў акупаваным расіянамі горадзе Алешкі адбылася гуманітарная аперацыя, ініцыяваная першай лэдзі ЗША Меланіяй Трамп. З Алешак вывезлі людзей, якія цярпелі ад нястачы прадуктаў і лекаў.

Гэта была першая ад пачатку вайны супольная місія Расіі і Украіны пад кіраўніцтвам амбудсменаў Яны Лантратавай і Дзмітрыя Лубінца. У пятніцу ўкраінская і расійская дэлегацыі разам з эвакуяванымі жыхарамі пакінулі горад.

«Гуманітарная дапамога дастаўленая. Калоны раздзяліліся — я еду ва Украіну», — заявіў Дзмітрый Лубінец у пятніцу.

Расійскія ваенкары раней паведамілі з Алешак, што ва Украіну праз Анапу выехалі 17 аўтобусаў з людзьмі, у Расію — чатыры. Але незалежнага пацвярджэння гэтай інфармацыі яшчэ няма.

Лубінец таксама расказаў, што колькасць дастаўленай гуманітарнай дапамогі ў горад «надзвычай вялікая».

Украінскі амбудсмен таксама прапанаваў зрабіць гуманітарныя місіі пад каардынацыяй першай лэдзі ЗША Меланіі Трамп рэгулярнымі.

Чаму не ўсе могуць выехаць

У пятніцу Лубінец апублікаваў відэа з акупаванага горада, дзе яго сустракаюць людзі, якія хочуць выехаць. На відэа жанчыны плачуць.

Жанчыны на відэа кажуць, што шмат людзей не паедзе з Алешак.

Дзмітрый Лубінец запосціў відэа з акупаваных Алешак. Фота: фэйсбук-старонка Дзмітрыя Лубінца

Расійская амбудсменка Яна Лантратава таксама апублікавала відэа з Алешак, дзе людзі плачуць і расказваюць пра голад. Лантратава паказала на відэа, як па розныя бакі збіраюцца ахвотныя выехаць у Расію і ва Украіну.

На відэа чуваць людзей, якія кажуць, што не могуць выехаць, бо даглядаюць ляжачых хворых.

Рэжым цішыні пры пасярэдніцтве Меланіі Трамп і Папы

У Алешках Херсонскай вобласці, што знаходзяцца пад расійскім кантролем, на працягу апошніх некалькіх месяцаў склалася сітуацыя, блізкая да гуманітарнай катастрофы.

Горад знаходзіўся пад пастаяннымі абстрэламі, а пакінуць яго было практычна немагчыма, бо большасць дарог замінаваныя. У горадзе амаль няма святла, не працуе водазабеспячэнне, а апошняя прадуктовая крама зачынілася яшчэ ўзімку.

У горадзе на левым беразе Дняпра, дзе да пачатку расійскага ўварвання ва Украіну жылі 24 тысячы людзей, зараз застаецца прыблізна паўтары тысячы чалавек, у тым ліку каля 40 дзяцей.

Пераважна гэта людзі сталага веку і маламабільныя людзі з цяжкімі захворваннямі, а таксама людзі без дакументаў.

Напрыканцы кастрычніка пры пасярэдніцтве Меланіі Трамп і Папы Льва XIV Расія і Украіна дамовіліся пра лакальнае прыпыненне агню, каб жыхары маглі пакінуць горад.

Чакаецца, што рэжым прыпынення агню ў Алешках працягнецца да канца нядзелі, 1 лістапада.

Каментары3

  • Filipp
    31.10.2026
    Із добрых навін, армія абодвух бакоў выканалі загады палітычнага кіраўніцтва і не атакавалі Херсон/ Алешкі.
  • Как обычно
    31.10.2026
    [Рэд. выдалена]

    [Зрэдагавана]
  • ТЦК
    01.11.2026
    Добро пожаловать!

Цяпер чытаюць

«Самы небяспечны — Пятрухін. А большасць — карысныя ідыёты». Адмін канала «Беларуская агентура» даў вялікае інтэрв'ю17

«Самы небяспечны — Пятрухін. А большасць — карысныя ідыёты». Адмін канала «Беларуская агентура» даў вялікае інтэрв'ю

Усе навіны →
Усе навіны

У інтэрнэце галасуюць за турыстычны лагатып Беларусі. Сярод лідараў праект былога палітвязня4

Дуа Ліпа ўжо носіць куртку, якую ўсе захочуць гэтай зімой11

«Гэта такая дробная, агідная помста Рамана». Соф’я Сапега расказала, як яе падманам знялі для перадачы Пратасевіча12

Заплацілі, каб змерзнуць на стадыёне. Фанаты «Сэлтыка» сабралі 90 тысяч еўра за адну ноч1

Віцебскі вядучы, на якога данеслі за жарт на закрытым мерапрыемстве, расказаў, чым усё скончылася4

Севярынец: Ціханоўскі перайшоў чырвоную рысу. Не ганьбі мужчынаў і беларусаў. Вяртайся63

Былога супрацоўніка КДБ з польскім грамадзянствам асудзілі да 14 гадоў9

Вызначыўся супернік зборнай Беларусі ў стыкавым матчы Лігі нацый5

19‑гадовы берасцеец Андрэй ліквідаваны пад Курдзюмаўкай24

больш чытаных навін
больш лайканых навін

«Самы небяспечны — Пятрухін. А большасць — карысныя ідыёты». Адмін канала «Беларуская агентура» даў вялікае інтэрв'ю17

«Самы небяспечны — Пятрухін. А большасць — карысныя ідыёты». Адмін канала «Беларуская агентура» даў вялікае інтэрв'ю

Галоўнае
Усе навіны →

Заўвага:

 

 

 

 

Закрыць Паведаміць