Усяго патроху22

Выконвае каманды і любіць «прычоскі». Пад Магілёвам жыве ягня, якое лічыць сябе сабакам

Бусік — ягня, але незвычайнае. Ён з першых дзён жыцця рос у доме з людзьмі, смактаў малако з дзіцячай бутэлечкі, спаў у ложачку, а за маму прымаў і прымае… магіляўчанку Тамару Мацвіенка. Як так выйшла, піша Magilev.by.

Бусік, як звычайна, жуе смакотку. Тут і далей фоты Тамары Мацвіенкі

Ніколі не кажы «ніколі»

Тамара Мацвіенка некалькі гадоў таму выйшла на пенсію, з'ехала з абласнога цэнтра і цяпер жыве з мужам у сваім доме ў Магілёўскім раёне.

У сям'і — вялікая гаспадарка: агарод, сад, каты і сабакі. А гэтай зімой у мужа і жонкі, як жартуе Тамара Рыгораўна, здарыўся прыплод. Вельмі мілы чорненькі і кучаравенькі «прыплодзік».

«Смешна сказаць, але для мяне гэта было ўсё адно, што на сёмым дзясятку нарадзіць дзіця, — рагоча суразмоўніца. — Зноў адчула ўсю любату мацярынства!»

Тамара з дзяцінства цярпець не можа авечак і бараноў. Нават пах іхні не пераносіць. А ўсё таму, што яе маленькую, калі хварэла, мама паіла барановым тлушчам.

«Гідота рэдкая! Бараніны, як разумееце, з тых часоў не ем. І ўжо каго-каго, а авечак трымаць наогул ніколі не збіралася».

Але, як гаворыць народная мудрасць, ніколі не кажы «ніколі»… Сястра-заатэхнік нечакана, ні з поля ні з лесу зрабіла радні такі вось «жывы падарунак», аргументаваўшы:

«Тома, у вас тут, на вёсцы, столькі прасторы! Ну, ты не любіш бараніны… Затое, можа, дзеці і ўнукі будуць есці».

А ў авечкі, якую падарылі, зноў-такі нечакана гэтай зімой нарадзілася двое дзіцянят… І панеслася!

Тая самая «глузда» з двума сваімі ягнятамі: аднаго затаптала, другога, Бусіка, выратавалі людзі

Маці або мачыха? «Глузда»!

«Калі мы зразумелі, што авечка нарадзіла дваіх ягнят, тэлефаную сястры і пытаюся: «Якія мае дзеянні?». Сястра адказвае: «Ніякіх! Гэта ж не карова, даіць нельга. Малыя самі павінны падысці і папіць малачка…»

Ніякіх дык ніякіх. А праз пару дзён муж знайшоў у хляве цельца аднаго ягняці — маці затаптала… У нас на вёсцы такіх называюць «глузда». Дурная баба, прасцей кажучы. Не маці, а мачыха.

Зноў тэлефаную сястры, каб параіцца. Яна рэкамендуе: «Ты паспрабуй падвядзі ягнятка, што жывое засталося, да авечкі». Я падводжу — тая як стала скакаць, як стала біць капытамі! Спрабую паднесці дзіцяня да вымені — гэтая «глузда» мне ледзь зубы не выбіла…

Што рабіць? Трэба забіраць маленькае ў хату… Яно ж зусім дробнае, каля 2 кілаграмаў. Загіне без ежы, без мацярынскага цяпла».

Муж і жонка знайшлі скрынку з-пад надзіманага басейна, заслалі яе пялёначкай і паставілі дзе цяплей у хаце. А менавіта ў сваёй спальні. Ды яшчэ, як высветлілася, карміць ягня трэба было, як чалавечае малое: кожныя тры гадзіны.

Навошта даросламу мужыку дзіцячая бутэлечка?

«Спрабую дзіцяня напаіць малаком, а яно — ніяк! — працягвае аповед Тамара Мацвіенка. — Кажу мужу: «Славік, ідзі ў аптэку па дзіцячую бутэлечку». А што рабіць?»

Вячаслаў таксама прывязаны да Бусіка: дзіцячыя бутэлечкі купляў ягняці менавіта ён

Балазе, аптэка ёсць у аграгарадку непадалёк. Там, вядома, невымоўна здзівіліся, калі дарослы мужык, пенсіянер, папрасіў бутэлечку для немаўляці.

Фармацэўты ў яго пытаюцца: «Слава, а табе для чаго?» Муж суразмоўніцы — мужчына з гумарам, адказвае: «Дзяўчаты, надакучыла гарэлку піць са шклянкі! Я налью сабе ў дзіцячую бутэлечку і паволі буду цадзіць…»

Увогуле, пачыналі паіць Бусіка з маленькай бутэлечкі, потым перайшлі на паўлітровую. Соску на бутэлькі працягвалі купляць у аптэцы. «Доза павялічваецца», — жартаваў «тата» Бусіка.

Уласна кажучы, і імя ягня атрымала ў гонар… першай бутэлечкі з соскай. На ёй было напісана «Бусінка», ну а раз хлопец — то Бусік.

«Тупае-тупае па хаце — не дае спаць»

Тамары дзеля кучаравага дзіцяняці прыйшлося кардынальна памяняць свой рэжым.

З Бусікам не засумуеш!

«Для мяне раней самае страшнае было, калі хтосьці пасля 21-й гадзіны тэлефанаваў. Усё, гэта значыць, ноч бяссонная! А тут, уяўляеце, інтэрвал кармлення — кожныя тры гадзіны. Ну нічога, сяк-так прывыкла».

Потым Бусік падужэў, стаў выскокваць са скрынкі.

«Тупае-тупае па хаце — не дае спаць. Кажу мужу: «У нас ёсць драўляны ложачак унука, даставай». Залезлі на гарышча, адшукалі. Знайшлі і матрац маленькі, апусцілі ў самы ніз, каб малы не выскокваў. Вось так і спалі ўсе халады».

Чым старэйшае рабілася ягня, тым больш павялічваліся прамежкі паміж кармленнямі. Бо Бусік, як і каты з сабакамі, прывык спаць усю ноч. Улічваючы створаныя яму каралеўскія ўмовы, можна сказаць, без задніх капытоў.

Ягня-сабака

З часам ягня стала лічыць сябе сабакам. Шмат у чым пачало капіраваць паводзіны сабакі.

Скажам, прыязджае ў госці да дзядулі з бабуляй унук — Бусік першы імчыцца з ім гуляць; пацяплела — суправаджае гаспадыню па справах; каманды выконвае. Нават не самыя для яго прыемныя.

Бусік за сваёй «мамай» Тамарай Мацвіенкай ходзіць як прывязаны

«Дапусцім, прыйшлі да суседкі, а ў яе кветачкі проста ў двары. Малы скок туды. Я, каб не пагрыз, клічу: «Бусік, да мяне!» Ён слухаецца. «Пайшлі дадому», — без пярэчанняў ідзе», — хваліць гадаванца гераіня.

А яшчэ ягня страшна любіць, калі яго расчэсваюць, робяць прычоскі. Гэта, як кажа Тамара Мацвіенка, для яго проста «фыр-фыр».

«Бусік — не пераходзячы вымпел»

На пытанне, што будзе з жывёлінай далей, жанчына адказвае:

«Бусік — не пераходзячы вымпел. Мы з ім не збіраемся расставацца».

Да таго ж цяпер ягня не стварае ніякіх клопатаў. Есць бульбачку, моркву, капусту, траўку жуе… А з дому яго з прыходам цяпла перасялілі ў хлеў (зрабілі асобнае стойла, каб з агрэсіўнай мамкай-авечкай не сутыкаўся). У ім Бусік начуе.

«Кожны вечар ён з задавальненнем бяжыць у свой хляўчук. Чаму? Бо ведае, што там яго чакае малако».

Днём жа ягня-сабака топчацца ў двары ці ходзіць за гаспадыняй. Ахоўвае.

«На руках ужо яго не цягаю — здаровенькі хлопчык вымахаў, — усміхаецца наша гераіня. — Проста абдымаемся, шкадуем, Бусік ліжа мне шчокі…»

Суседзі ж да незвычайнага «пажа» Тамары Мацвіенкі даўно прызвычаіліся. І калі раней дзівіліся ды жартавалі, то цяпер прыходзяць у госці і перш за ўсё кажуць: «О, прывітанне, Бусік!»

Каментары2

  • Acab
    07.06.2024
    Якое яно на смак?
  • валодаў
    08.06.2024
    Па вопыту трымання авечак скажу, што звычайна тыя бараны, што выкармленыя людзьмі, калі вырастуць пачынаюць біцца

Цяпер чытаюць

Від на Каложскую царкву безнадзейна сапсаваны41

Від на Каложскую царкву безнадзейна сапсаваны

Усе навіны →
Усе навіны

Гіганцкі фантан працаваў сёння раніцай у Мінску

Памерла Ганна Садоўская — дзяячка польскай супольнасці ў Ваўкавыску1

«Лік ідзе на хвіліны, а сваякі павінны бегаць па вуліцы і шукаць мужчын». Ці павінна хуткая дапамога выносіць пацыента з кватэры?13

«Пад канвоем вывезлі нас з мяжы». Расійская блогерка расказала пра затрыманне мужа на беларускай мяжы праз падпіску5

Памёр 87‑гадовы турэцкі мільярдэр, уласнік мінскай Crowne Plaza. Але грошай не пакінуў ні жонцы-беларусцы, ні чатыром дзецям62

Стваральніца Belaruskicry упершыню пасля доўгай паўзы расказала, што цяпер з брэндам пасля прызнання яго экстрэмісцкім1

З цягніка зблізку знялі на відэа разбураную частку Крымскага моста8

У цэнтры Мінска на мосце 21‑гадовы перакуліўся на BMW. Момант трапіў на відэа2

Правакацыя з вялікай колькасцю ахвяр і абвінавачваннем Украіны. Стала вядома, якую правакацыю рыхтавалі на польска-расійскай мяжы7

больш чытаных навін
больш лайканых навін

Від на Каложскую царкву безнадзейна сапсаваны41

Від на Каложскую царкву безнадзейна сапсаваны

Галоўнае
Усе навіны →

Заўвага:

 

 

 

 

Закрыць Паведаміць