Свет44

Еменскія хусіты захапілі стратэгічныя астравы Баб-эль-Мандэбскага праліва. Адзін з найбуйнейшых гандлёвых шляхоў фактычна апынуўся пад кантролем баевікоў

Паводле ўрада Емена, зараз паўстанцы кантралююць стратэгічны праліў Баб-эль-Мандэб, праз які праходзіць больш за дзясятую частку сусветнага грузапатоку. ЗША адмовіліся ад прамога ваеннага ўмяшання, нягледзячы на неаднаразовыя просьбы саюзнікаў.

Размяшчэнне вострава Перым у праліве. Да афрыканскага берага ад яго ўсяго 20 км

Як паведамляе нямецкае выданне DW, праіранскі рух хусітаў усталяваў кантроль над стратэгічнымі астравамі Перым, Зукар і Ханіш. Фактычна гэта азначае захоп Баб-эль-Мандэбскага праліва, аднаго з найважнейшых марскіх гандлёвых маршрутаў паміж Адэнскім залівам і Чырвоным морам. Урадавыя войскі Емена спешна пакінулі гэтыя тэрыторыі, саступіўшы баевікам таксама і прыбярэжны партовы горад Моха.

Баб-эль-Мандэбскі праліў застаецца паўднёвымі варотамі паміж Азіяй і Еўропай. Яго каштоўнасць узрасла шматразова пасля таго, як вайна паміж ЗША, Ізраілем і Іранам фактычна спыніла рух праз Армузскі праліў. Саудаўская Аравія, пазбаўленая свайго галоўнага ўсходняга экспартнага акна, пераарыентавала пастаўкі нафты на захад, да Чырвонага мора. Цяпер хусіты зачыняюць і гэтыя дзверы. Прадстаўнік ваеннага крыла паўстанцаў Ях'я Сары адкрыта заявіў, што суднаходства бяспечнае для ўсіх, акрамя саудаўскіх караблёў.

Эканамічны ўдар прыйшоўся з розных бакоў. Выданне BILD адзначае, што атакі паўстанцаў прывялі да прыпынення працы найважнейшага саудаўскага нафтаправода «Усход—Захад», які служыў апошняй альтэрнатывай заблакаванаму Армузскаму праліву. Сусветныя рынкі адрэагавалі вокамгненна, і цана за барэль нафты маркі Brent перавысіла сто дзесяць даляраў.

На днях амерыканская кампанія Anthropic афіцыйна паведаміла пра блакаванне карыстальнікаў з поўначы Емена, якія з дапамогай звычайных смартфонаў намагаліся выкарыстаць штучны інтэлект для праектавання гіпергукавых і балістычных ракет.

Бяздзеянне Амерыкі

За стварэннем новага фронту стаіць непасрэдна іранскі Корпус вартавых ісламскай рэвалюцыі. Тэгеран шчодра забяспечвае сваіх еменскіх проксі-саюзнікаў фінансамі, зброяй і афіцэрскімі кадрамі. Разлік Ірана відавочны — максімальна расцягнуць рэсурсы праціўнікаў і прымусіць іх ваяваць на некалькіх кірунках адначасова. Аднак галоўны праціўнік на гэтую прынаду пакуль не клюе.

Спадчынны прынц Саудаўскай Аравіі Мухамед бін Салман апынуўся ў сітуацыі катастрафічнага цэйтноту. Яшчэ ў ліпені Эр-Рыяд саманадзейна запэўніваў Вашынгтон у здольнасці самастойна справіцца з хусітамі, калі наносіў прэвентыўныя ўдары па аэрапорце Саны. Сёння рыторыка змянілася на дыяметральна супрацьлеглую. Прынц двойчы за дзень тэлефанаваў Дональду Трампу з просьбай нанесці прамыя амерыканскія ўдары па пазіцыях баевікоў, якія набліжаліся да праліва.

Гаспадар Белага дома адказаў цвёрдай адмовай. Амерыканская адміністрацыя імкнецца любой цаной пазбегнуць прамога ўцягвання ва ўзброены канфлікт з хусітамі, абмяжоўваючыся перадачай разведданых.

Камандзір Цэнтральнага камандавання ЗША Брэд Купер тэрмінова прыбыў у Саудаўскую Аравію, дзе зараз знаходзяцца каля дзвюх сотняў амерыканскіх вайскоўцаў, аднак іх місія носіць выключна кансультацыйны характар і не прадугледжвае ўдзелу ў баявых дзеяннях.

Каментары4

  • барадзед
    13.09.2026
    лапідарна
  • Канапная аналітыка
    13.09.2026
    Хусіты аб’ядналіся з Зяленскім как справакаваць сусветный крызіс нозьбітаў энергіі (інфа 150%)
  • Жэка
    13.09.2026
    У ЗША ёсьць свая нафта. А что будет рабіць Яўропушка з Натушкай? Гэта іх праблемы. Трампу з Іранам не дапамаглі - ўпярод цяпер з гусітамі ваяваць. Гэта не амерыканцаў вайна)

Цяпер чытаюць

Від на Каложскую царкву безнадзейна сапсаваны41

Від на Каложскую царкву безнадзейна сапсаваны

Усе навіны →
Усе навіны

Памерла Ганна Садоўская — дзяячка польскай супольнасці ў Ваўкавыску1

«Лік ідзе на хвіліны, а сваякі павінны бегаць па вуліцы і шукаць мужчын». Ці павінна хуткая дапамога выносіць пацыента з кватэры?13

«Пад канвоем вывезлі нас з мяжы». Расійская блогерка расказала пра затрыманне мужа на беларускай мяжы праз падпіску5

Памёр 87‑гадовы турэцкі мільярдэр, уласнік мінскай Crowne Plaza. Але грошай не пакінуў ні жонцы-беларусцы, ні чатыром дзецям62

Стваральніца Belaruskicry упершыню пасля доўгай паўзы расказала, што цяпер з брэндам пасля прызнання яго экстрэмісцкім1

З цягніка зблізку знялі на відэа разбураную частку Крымскага моста8

У цэнтры Мінска на мосце 21‑гадовы перакуліўся на BMW. Момант трапіў на відэа2

Правакацыя з вялікай колькасцю ахвяр і абвінавачваннем Украіны. Стала вядома, якую правакацыю рыхтавалі на польска-расійскай мяжы7

Амерыканка пабіла рэкорд беларускі па кручэнні ў паветры на ўласных валасах

больш чытаных навін
больш лайканых навін

Від на Каложскую царкву безнадзейна сапсаваны41

Від на Каложскую царкву безнадзейна сапсаваны

Галоўнае
Усе навіны →

Заўвага:

 

 

 

 

Закрыць Паведаміць