Улада

«Чакаем больш сур’ёзных крокаў». Крыніцы ў дыпкорпусе пра ліст Макея

Учора стала вядома пра ліст Уладзіміра Макея да еўрапейскіх краін, у якім міністр замежных спраў Беларусі абяцае, што наша краіна не будзе ўцягнутая ў вайну ва Украіне і гаворыць пра «нешчаслівую чараду падзей пасля 2020 года». Як гэта ўсё успрыняла мэтавая аўдыторыя паслання? 

Фота: Yury Kochetkov / Pool Photo via AP

«Чакаем больш сур’ёзных крокаў. Калі гаворыцца, што вы ў вайне не ўдзельнічаеце, то расійскія войскі павінны быць выведзеныя», — так адказаў «Нашай Ніве» еўрапейскі дыпламат, які даўно займаецца Беларуссю і ўдзельнічае ў вызначэнні кірункаў палітыкі адносна Беларусі.

Як збіраецца адказаць на ліст Еўропа?

«Мы нічога не будзем рабіць. Пачыталі, цікава. Чакаем далей», — кажа ён.

«Пакуль ніякіх крокаў Мінск не зрабіў, таму мы працуем над яшчэ адным пакетам санкцый. Гэта зноў будуць істотныя меры. Раз Лукашэнка і Макей нас не чуюць, мы будзем рабіць так, каб яны нарэшце пачулі», — дадае ён.

«Вывад расійскіх войскаў з Беларусі — гэта абавязковая ўмова для пэўнага паслаблення рэжыму санкцый, — кажа дыпламат. — Другая ўмова — вызваленне палітвязняў. А для поўнага зняцця санкцый патрэбны план дэмакратызацыі. Пакуль не будзе рэалізоўвацца план дэмакратызацыі, частка санкцый застанецца», — дадае дыпламат.

У гэтым трэцім пункце — адрозненне ад 2015 года, тады такога пункту не было.

«У лісце спадара Макея шмат хлусні і абсурду, з аднаго боку, але гэта таксама спроба ўвайсці ў кантакт з некаторымі краінамі ЕС, — кажа дыпламат з адной з вялікіх еўрапейскіх краін. — Гэта можа быць як спроба падарваць адзінства краін ЕС па беларускім пытанні, так і праява сур’ёзнай занепакоенасці тым, у якой сітуацыі Беларусь апынулася адносна Расіі», — дадае ён.

Якая будзе рэакцыя на ліст?

«Да той пары, пакуль афіцыйны Мінск глыбока ўцягнуты ў незаконную вайну Расіі супраць Украіны — а Мінск уцягнуты! — асабіста я не бачу ніякай прасторы для манеўру для нікога адносна афіцыйнага Мінска, — кажа дыпламат і з доляй сарказму дадае. — Лукашэнка з Пуціным у аўторак знаходзіліся на касмадроме «Восточный». Тады ад імя каго гаворыць у сваім лісце Макей? Аднак, я таксама лічу, што і мы, і грамадзяне Беларусі зацікаўленыя ў захаванні таго, што ад суверэнітэту Беларусі засталося», — дадае ён.

Дыпламаты адзначаюць, што ліст з'явіўся на фоне разгулу антызаходняй прапаганды ў Беларусі і ўсё новых арыштаў. «Пачакайце, мы ўвялі санкцыі, бо вы пасадзілі 200 палітвязняў. Цяпер у вас іх 1200. Вы думаеце, што 200 нас трывожылі, а пра 1200 мы скажам «ну, цяпер ок»? Вы нас лічыце ідыётамі або ў вас саміх нешта не так з логікай?» — іранізуе адзін з суразмоўцаў «Нашай Нівы». 

«Гэты ліст — пустая ракавіна. Ты бярэш яе ў рукі, а там нічога няма: Макей нічога не прапануе», — кажа яшчэ адзін дыпламат.

«Лісты дыялогу не дапамогуць. Патрэбныя канкрэтныя крокі: вывад войскаў, вызваленне палітычных зняволеных, усё сказана сто разоў. Але набіраць лісты прасцей, чым рэальна рабіць», — думка прадстаўніка адной з балтыйскіх краін.

Паводле інфармацыі «Нашай Нівы», пад шосты пакет санкцый, які будзе прыняты, калі Мінск працягне варожыя дзеянні, падпадзе, у прыватнасці, частка дзяржаўных прадпрыемстваў хімічнай галіны, а таксама фізічныя асобы — напрыклад, дзеці лукашэнкаўскага фаварыта Алексіна. 

«Мы спрабавалі па-добраму, Мінск гэтым не скарыстаўся. Лукашэнка не разумее Захаду і не хоча разумець. Што ж, яго выбар», — дадае высокапастаўлены дыпламат, які раней быў паслом у Беларусі.

Усе апытаныя еўрапейцы сыходзяцца ў меркаванні, што да вываду расійскіх войскаў з тэрыторыі Беларусі з лукашэнкаўцамі гаварыць ніхто не будзе. 

Каментары

Цяпер чытаюць

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

УСУ ўдарылі па Крымскім мосце. Рух транспарту спынены15

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць