Грамадства3232

Рэдкі выпадак: памілаваны беларускі палітвязень пайшоў на вайну супраць Украіны

У свой час Расія дэпартавала ў Беларусь Аляксея Коршуна, хоць ён прасіў прытулку. А цяпер пайшоў ваяваць за яе. «Ганаруся сваім героем! Я буду чакаць, верыць і маліцца», — піша новая расійская жонка Аляксея.

Аляксей Коршун, фота: Vk.com

Былы палітвязень Аляксей Коршун, якога ў 2022 годзе Расія выдала беларускім сілавікам, цяпер, мяркуючы па допісах ягонай жонкі ў сацсетках, ваюе на баку Расіі супраць Украіны.

Валгаградская манікюршчыца Анжэла Коршун выклала ягоныя фотаздымкі ў форме расійскага войска з подпісам: «Шалёна ганаруся сваім героем. Найлепшы мужчына на свеце, я страшна цябе кахаю і чакаю хутчэй дадому. Я абяцаю, што буду ўсміхацца і жыць паўнавартасным жыццём. Чакаць, верыць і маліцца! Ты мая самая надзейная апора, ты мой гонар, ты мой герой».

Тэрмін зняволення за каментар пра каранавірус

Аляксею Коршуну 30 гадоў. Паводле інфармацыі праваабаронцаў, мужчына з Оршы, але ў яго самога Укантакце родным горадам стаіць Полацк.

Коршуна арыштавалі ў сакавіку 2021 года за каментар пра каранавірус, напісаны падчас першай хвалі эпідэміі. У тэксце гаварылася, што ўлады хлусяць у статыстыцы захворванняў. Запіс палічылі распальваннем варожасці.

Коршуну прысудзілі 2,5 года калоніі, але яму пашанцавала трапіць пад памілаванне ў верасні 2021 года. Магчыма, улічылі, што яго нявеста толькі-толькі нарадзіла.

Але памілаванні тады былі не такія, як цяпер. Коршуна не зусім адпусцілі дадому, а толькі перавялі на хімію. Палітвязень працаваў грузчыкам у мясцовым сельпо.

Па яго словах, намеснік начальніка хіміі паставіў яму ўльтыматум: альбо па-хуткаму атрымаць парушэнні і вярнуцца ў калонію, альбо ўцякаць з краіны.

Восенню 2021 года Коршун збег. Каб навесці міліцыю на падманны след, ён свой тэлефон падкінуў у аўтобус, што ішоў у іншы канец краіны, а сам паехаў у Віцебск. Наступнага дня без дакументаў ён перасек расійскую мяжу аўтобусам.

Спачатку Коршун асеў у Смаленску, дзе раней жыў з былой дзяўчынай-расіянкай і дзіцём. Потым праваабаронцы з «Байсола» перавезлі яго ў Белгарад, адкуль планавалі пераправіць ва Украіну. Але 24 лютага 2022 года пачалася вайна. Атрымаць прытулак у Грузіі таксама не ўдалося, і Коршун пераехаў у Варонеж, дзе ўладкаваўся ў аўтасэрвіс.

Аляксей Коршун

Дэпартацыя

21 чэрвеня 2022 года расійская ДАІ спыніла таксі, у якім ехаў Коршун. Дакументаў у яго не было, а ў пастарунку высветлілася, што ён у вышуку.

Беларус спрабаваў атрымаць прытулак, але атрымаў адмову. У кастрычніку 2022 года Коршуна выслалі самалётам у Мінск.

У Беларусі суд замяніў яму хімію на калонію — але, паводле заканадаўства, неадбыты тэрмін яму скарацілі ўдвая. Незразумела, ці дадалі яму нейкае пакаранне за ўцёкі з хіміі.

Коршун адбываў пакаранне ў калоніі №17 у Шклове. Паводле «Вясны», 20 жніўня 2023 года ён выйшаў на волю, цалкам адбыўшы тэрмін.

Цяпер — у расійскай форме

Аляксей Коршун, фота: Vk.com

Пасля вызвалення беларус, мяркуючы па сацсетках, чарговы раз перабраўся ў Расію і адкрыў аўтасэрвіс.

Аднак пазней, па словах Коршуна, у яго ўзніклі праблемы з лёгкімі. Медыкі забаранілі яму займацца аўтамалярнымі працамі. Тады беларус купіў закінуты ўчастак і пачаў будаваць дом. Адначасова ён вёў дачны блог.

Зрэшты, імпэту хапіла ненадоўга. Скончылася ўсё падпісаннем кантракту з расійскай арміяй.

Пакуль што ён жывы.

Каментары32

  • Alex
    07.10.2026
    Анжэла чакае грошыкi.
  • политзек
    07.10.2026
    [Рэд. выдалена]
  • Праходзіў побач
    07.10.2026
    Эх, такі малады, а ўжо доўбень.

Цяпер чытаюць

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

УСУ ўдарылі па Крымскім мосце. Рух транспарту спынены15

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць