Ад рэдакцыі9696

Ціханоўскі і Пятрухін распаўсюдзілі новую лабуду: што палітвязень Папоў атрымаў 16 гадоў турмы з-за публікацыі «НН»

Сяргей Ціханоўскі выступіў з чарговымі абвінавачваннямі ў бок «Нашай Нівы». Паводле Ціханоўскага, наша выданне датычнае да зняволення палітвязня Дзмітрыя Папова. Гэтая інфаспекуляцыя разлічаная на людзей, якія не ўмеюць гугліць. Прыводзім факты. А пасля іх — тое, што мы думаем пра апошнія дзеянні Сяргея Ціханоўскага.

Сяргей Ціханоўскі. Фота: stranadlyazhizni / instagram

«Я ведаю выпадкі, калі публікацыі «Нашай Нівы» фігуравалі ў крымінальных справах як доказы абвінавачвання. На маім судзе такая публікацыя выкарыстоўвалася ў справе Дзмітрыя Папова, якога ў выніку прысудзілі да 16 гадоў», — напісаў Ціханоўскі ў фэйсбуку.

А блогер Сяргей Пятрухін уключыў падчас свайго стрыму галасавое паведамленне, якое яму адправіў Ціханоўскі.

«Сядзяць невінаватыя людзі, недатычныя людзі. Сядзяць праз іх артыкулы. У адным яны напісалі, што Папоў вёў сацсеткі Ціханоўскага. Расіянін такі. Гэта няпраўда, а чалавек сядзіць. А ў другім, што Ціханоўскі з Расіяй звязаны. Вось яны знайшлі адзінага расіяніна не ў маёй камандзе, а знаёмы майго відэааператара. Ён зараз сядзіць, яму 16 гадоў. Гэта з-за публікацыі гэтай інфапамыйкі», — прагучала ў стрыме.

Гэтая інфаспекуляцыя разлічаная на людзей, якія не ўмеюць гугліць і супастаўляць факты. Палітвязень Дзмітрый Папоў — малавядомы, таму што ў Беларусь ён прыехаў з Расіі незадоўга да падзей 2020 года. Папоў быў вядомы ўдзелам у расійскіх праектах «Сканер» (па дэананімізацыі сілавікоў) і «Мужчынская дзяржава». Пра жыццё Папова ў Расіі падрабязна пісала «Медыязона». Калі ён пераехаў у Беларусь — невядома.

На сайце «Наша Ніва» Папоў згадваўся чатыры разы, усе чатыры разы гэта перадрукі: адно паведамленне «Радыё Свабода» і тры кароткія інфармацыі праваабарончага цэнтра «Вясна». Вось што пісалася ў тых перадруках.

4 чэрвеня 2020 года пра затрыманне Папова паведаміў карэспандэнту «Радыё Свабода» мазырскі фермер, да якога ў дом уварваліся сілавікі:

«Былі і на берасцейскіх, і на мінскіх нумарах. Аказалася, яны шукалі Дзіму Папова — ён працаваў аператарам у Сяргея Ціханоўскага. Дзіма, праўда, быў у нас, але ён збег. … Выпытвалі, дзе Дзіма Папоў. Перавярнулі ўвесь дом мой, забралі тэхніку».

«Наша Ніва» пераставіла той тэкст: «Наляцелі 18 міліцыянтаў, дом дагары нагамі!» Мазырскі фермер расказаў, як у яго шукалі паплечніка Ціханоўскага.

Наступная згадка Папова на сайце «Нашай Нівы» — 8 ліпеня 2020 года. Тады ў перастаўленым з «Вясны» пераліку затрыманых блогераў і актывістаў называецца і расіянін. Праваабаронцы прадставілі яго як «мадэратара сацсетак «Краіны для жыцця».

10 ліпеня 2020 года вясноўцы даведаліся пра тое, што на Папова завялі крымінальную справу, а 13 ліпеня 2020 года ён быў прызнаны палітвязнем. У гэтых навінах ён па-ранейшаму фігуруе як «мадэратар сацсетак Ціханоўскага».

Ці можна паверыць, што скрыншоты гэтых перадрукаў на сайце «Нашай Нівы» былі асновай абвінавачвання на судзе? Не, гэта дурасць.

29 ліпеня 2020 года ў эфіры АНТ паказалі частку паказанняў, якія даваў Дзмітрый Папоў. Памяшканне, у якім адбывалася здымка, падобнае да кабінета для допытаў СІЗА №1 на Валадарцы. Камера (хутчэй за ўсё, схаваная) ці то ўстаноўленая на стале, ці то прымацаваная да формы кагосьці са следчых.

У гэтым відэа Папоў расказвае пра супрацоўніцтва з камандай Ціханоўскага. Магчыма, паказанні даваліся пад ціскам, але ў любым выпадку сказаныя ім словы дайшлі да суда і ляглі ў абвінавачванне. Нават калі б Папоў на працэсе і казаў бы адваротнае.

Так, у палітычныя крымінальныя справы ў якасці дадатковых элементаў могуць падшываць і матэрыялы незалежных СМІ. Там справы абсурдныя, высмактаныя з пальца. Але гэта не значыць, што Папова пасадзілі ў выніку публікацый СМІ ці праваабаронцаў.

«НН» заклікае Сяргея Ціханоўскага спыніць распаўсюд хлуслівай інфармацыі.

* * *

Ціханоўскі і Пятрухін чапляюцца да словаў журналістаў: там не тое слова, там не такі загаловак — а самі распаўсюджваюць поўную лабуду. Разлічваюць, што ніхто не будзе ўдумвацца, а ім — порцыя ўвагі. Магутны ўдар па лукашызме нанесены, казкі расказаныя. І не прыдумалі іншага спосабу прыцягнуць да сябе ўвагу як распачаць вайнушку. Але інфаспекуляцыя сёння дае табе пару клікаў, але доўгатэрмінова — дыскрэдытуе. У Пятрухіна даўно не засталося рэпутацыі, Ціханоўскі гэтымі апошнімі крокамі знішчае астаткі сваёй. 

* * *

Можам мы памыляцца? Бывае. Можам мы ўжыць недакладнае, некарэктнае слова? Бывае. У кожнага тое бывае. Напішыце нам, папраўце, удакладніце, патлумачце, калі мы нешта не так зразумелі — мы выправім, размесцім ваш адказ, ваша ўдакладненне. Мы даём слова і тым, і тым.

«Наша Ніва» мае цвёрдыя прынцыпы. Калі вы сядзелі, мы вас баранілі. Але калі вы на свабодзе, а тым больш прайшоў год, і вы палітык — за дзейнасцю палітыкаў любога колеру мы сачылі і будзем сачыць крытычна.

Палітыкі не дзеці, каб ім у дупу дзьмухалі.

Пісалі і пісаць мы будзем зубаста, а часам і з’едліва, а часам з іроніяй.

Тут мусім зрабіць адступленне і патлумачыць чытачам — асабліва новым чытачам, якія пачалі чытаць «Нашу Ніву» пасля жніўня 2020-га, якія не разумеюць, чаму такая шура-бура. Насамрэч, рахункі даўнейшыя. У Сяргея Ціханоўскага вялікая крыўда на «НН» яшчэ за артыкул 2019 года «Раней фоткаўся з Сабчак, цяпер — з Севярынцам. Хто такі палітычны блогер Сяргей Ціханоўскі?». Мы ведаем пра гэта, бо ў 2025‑м на самай першай пасля вызвалення сустрэчы з журналістамі ў Варшаве нам давялося ад Ціханоўскага выслухаць шмат цёплых слоў пра той даўні артыкул. Але паўторымся: мы пісалі і будзем пісаць пра палітыкаў крытычна. Што было вядома пра Ціханоўскага па стане на той момант — тое і напісалі.

«Наша Ніва» век па сумленні рабіла тое, што лічым сваім абавязкам, што нам здавалася правільным. Мы і ў 2021‑м стаялі на варце да канца. Які абсурд думаць, што нехта сваёй лабудой у фэйсбуку змусіць нас абслугоўваць кагосьці; і якая недалёкасць у разуменні механізма адносін незалежных прыватных СМІ і іх данацёраў, донараў, фундатараў. 

Ціханоўскі сваёй бессэнсоўнай, нікому не патрэбнай вайной сябе дыскрэдытуе, а не нас.

Каментары96

  • Ты гоніш, Сяргей
    01.09.2026
    Сколькі села з-за тваіх стрымаў людзей, навошта адкрываць скрынку пандоры было? Прапаную Нашай Ніве вывучыць архіў матэрыялаў спраў, сколькі было вынесена вендыктаў па скрыншотах са стрымаў Страшны для Жизни і чату., і падаць гэтую сухую статыстыку народу, а не расшарквацца перад абарзеўшым.
  • барадзед
    01.09.2026
    сярожа зусім паплыў, сумна
  • не такі, як ёсць
    01.09.2026
    Мяне насамрэч здзіўляе не тое, што робіць Ціханоўскі, а тое, што нехта чакаў ад яго іншага

Цяпер чытаюць

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

УСУ ўдарылі па Крымскім мосце. Рух транспарту спынены15

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць