Спорт33

У чарговым шоу на ТНТ — беларускі дэсант: гімнастка Галкіна, баксёр Кудзін і не толькі

На расійскім тэлеканале паказалі першы выпуск новага сезона шоу «Тытаны». Сярод 111 спартоўцаў-удзельнікаў аказалася ажно шасцёра беларусаў — расіяне прыцягнулі сапраўдных зорак.

Кацярына Галкіна і Аляксей Кудзін. Фота на калажы: galkina_katia / Instagram, kudin_alexey_mma / Instagram

ТНТ здымае «Тытанаў» з 2024 года. Менавіта тады босы канала звярнуліся да ШІ і той распрацаваў складаныя фізічныя выпрабаванні для спартоўцаў і вядомых асобаў. Ідэя шоу не арыгінальная — падобны праект з'явіўся раней на Netflix.

Першы сезон паказалі летам 2024-га, а цяпер, 13 верасня, прайшла прэм’ера ўжо чацвёртага сезона. Гэтым разам арганізатары сабралі 111 спартоўцаў, у тым ліку і шэсць беларусаў.

Перш за ўсё, гэта Кацярына Галкіна — лідарка зборнай па мастацкай гімнастыцы ў другой палове 2010-х, цяпер яна жыве ў Маскве і зарабляе на жыццё трэнерствам. Таксама на ўдзел пагадзіліся Цімафей Калачоў, былы футбаліст і зорка нацыянальнай зборнай, разам з дачкой-лёгкаатлеткай Янай Калачовай.

Яшчэ ў шоу паклікалі Аляксея Кудзіна, шматразовага чэмпіёна свету ў тайскім боксе і кікбоксінгу, а таксама былога палітвязня. І Дзяніса Ганчаронка, яшчэ аднаго шматразовага чэмпіёна свету па тайскім боксе з Беларусі.

Шостым з беларусаў у «Тытанах» аказаўся Марк Рудакоўскі, хакеіст, які фактычна скончыў кар’еру ў 2025-м. Але ж больш вядомы ён не праз гульню, а праз сваю медыйнасць. Марк жанаты на расійскай блогерцы Карыне Крос, старэйшай за яго на 11 гадоў, мае амаль 73 тысячы падпісчыкаў у інстаграме, здымаецца ў кіно ў эпізадычных ролях і паўдзельнічаў у шоу «Ледніковы перыяд».

Цімафей Калачоў прызнаваўся журналістам, што пагадзіўся на ўдзел дзеля дачкі:

«Напэўна, галоўным для мяне быў не сам удзел, а магчымасць падтрымаць Яню і прайсці гэты вопыт разам з ёй. Я яшчэ да праекта пастаянна жартаваў, што вазьму ўдзел максімум у адной серыі, а Яня пойдзе далей. 

Для мяне гэта быў цалкам новы досвед, але самае галоўнае — мы з Яняй змаглі прайсці яго разам. Думаю, менавіта гэта і застанецца для мяне самым каштоўным успамінам пра гэты праект».

У выпуску, што выйшаў 13 верасня, удзельнікаў падзялілі на тры групы. Ім трэба было як мага больш разоў узысці на платформу з нахілам у 30 градусаў. На лініі фінішу ўдзельнікі мусілі націснуць на спецыяльную кнопку і вярнуцца на лінію старту да гукавога сігналу, прычым інтэрвал паміж сігналамі паступова скарачаўся. 

«Нам кожнаму далі форму, прысвоілі ўласны нумар, з якім ты існуеш увесь праект. Вядома, глядзіш мінулыя выпускі і мяркуеш, што цябе чакае ў наступным сезоне, але ніколі ў жыцці не здагадаешся. Мы загадзя нічога не ведаем, і калі выходзім у калізей (пляцоўку для спаборніцтваў — НН), бачым, што нас чакае, афігеваем і рыхтуемся да свайго дэбюту — ці, як яшчэ можна сказаць, да ганьбы», — так Кацярына Галкіна апісвала падрыхтоўку да шоу.

Па выніках першага выпуску шоу пакінулі 11 удзельнікаў. Беларусаў сярод іх няма, але ж няма іх і сярод найлепшых удзельнікаў, якія атрымаюць бонус у наступным выпуску.

Дзяніс Ганчаронак расказаў у сторыс, як ён адчуваў сябе пасля першага дня ў шоу:

«Пасля выпрабавання ногі былі проста забітыя ў нерэальны хлам, хадзіць немагчыма! У выніку я забег 30 пад’ёмаў і быў 92‑м са 111 чалавек. Ад вылету аддзяляла ўсяго 7 пазіцый, але пайшоў далей».

«Наша Нiва» — бастыён беларушчыны

ПАДТРЫМАЦЬ

Каментары3

  • Эге
    16.09.2026
    Цікава, што толькі спартоўцаў асядае ў Масквабадзе, тады як іх кваліфікацыя як раз вельмі лёгка пераносіцца ў любым грамадстве свету - хочаш у Еўропе, ЗША ці ў якіх аб'яднаных арабскіх генацыдах.

    Культура часам больш важкі фактар міграцыі, чым працоўныя здольнасці.
  • Хмм
    16.09.2026
    Эге, это не так работает. Бывшие спортсмены участвуют в спортивных шоу, а там нужен свободный язык и понятный зрителю менталитет.
  • Сваім паказвайце!
    16.09.2026
    Хмм, мацквабадскія "шоу́" паказвайце сваім дзецям, калі яны у́ вас ёсць, канешне!

Цяпер чытаюць

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

УСУ ўдарылі па Крымскім мосце. Рух транспарту спынены15

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць