Грамадства1212

Чаму Дзмітрыя Скіндзерава высылаюць з Літвы? На гэта ёсць пяць прычын

У рашэнні Дэпартамента міграцыі Літвы пералічана, што канкрэтна літоўская дзяржбяспека мае на правакатара, які абвясціў вайну Святлане Ціханоўскай, а ў кавярні накінуўся на Дзяніса Кучынскага.

Дзмітрый Скіндзераў

Дэпартамент міграцыі пры МУС Літвы адмяніў статус бежанца Дзмітрыю Скіндзераву і вырашыў выслаць яго ў Беларусь. Уезд у Літву яму забаронены на дзесяць гадоў, у шэнгенскую зону — на пяць.

Гэта рашэнне Скіндзераву зачыталі 3 лістапада 2026 года. Ён з ім не згодны і збіраецца абскарджваць у судзе, але высылку суд не спыніць: падставай для яе названая пагроза нацыянальнай бяспецы.

Чытайце: Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве

Працэдура пачалася 4 чэрвеня 2026 года, калі Дэпартамент міграцыі атрымаў заключэнне Дэпартамента дзяржаўнай бяспекі Літвы (VSD). Выснову, што Скіндзераў пагражае бяспецы Літвы, дэпартамент абгрунтоўвае сукупнасцю абставін, якія ён сам пералічвае ў пастанове. Скіндзераў апублікаваў пераклад дакумента ў сваім тэлеграм-канале.

1. Сувязі з КДБ, ГУБАЗіК і ДФР, якія працягваліся і ў Літве

У Беларусі Скіндзераў падтрымліваў сувязі з супрацоўнікамі мінскага і віцебскага КДБ, Дэпартамента фінансавых расследаванняў, ГУБАЗіК і іншых праваахоўных органаў. Пасля пераезду ў Літву кантакты, як сцвярджае VSD, працягваліся. Аднак прытулку Скіндзераў прасіў якраз таму, што гэтыя структуры яго нібыта пераследавалі.

2. Заданне ГУБАЗіК

Скіндзераў выконваў заданне супрацоўніка ГУБАЗіК і збіраў інфармацыю пра іншага грамадзяніна Беларусі. Дэпартамент міграцыі падкрэслівае, што гэта ўжо не «фармальныя ці выпадковыя кантакты».

3. Схаваў звесткі ў анкеце

28 сакавіка 2023 года ў анкеце Дэпартамента міграцыі Скіндзераў адказаў «не» на пытанні, ці меў ён калі-небудзь кантакты са спецслужбамі і сілавымі структурамі краін па-за НАТА і ЕС, ці перадаваў ім інфармацыю і ці выконваў іх даручэнні.

4. Тлумачэнні мяняліся

На размове 22 чэрвеня 2026 года Скіндзераў адмаўляў любое супрацоўніцтва з КДБ і ГУБАЗіК. 10 ліпеня яго азнаёмілі з заключэннем VSD, і тады ён прызнаў кантакты з рознымі беларускімі спецслужбамі і «шчыльнае супрацоўніцтва» з ДФР. Гэта супрацоўніцтва ён растлумачыў расследаваннем фінансавых злачынстваў, ад якіх нібыта пацярпелі ён і яго інвестары.

Розніцу з анкетай ён растлумачыў тым, што слова «кантакты» разумеў вузка. На той жа размове ён прызнаў, што ў 2002 годзе быў асуджаны паводле ч. 3 арт. 208 КК Беларусі (вымагальніцтва). Дэпартамент зрабіў выснову, што звесткі пра кантакты «істотна мяняліся», і гэта падрывае давер да слоў Скіндзерава.

5. Ім могуць скарыстацца беларускія спецслужбы

VSD лічыць, што з такімі сувязямі Скіндзерава могуць скарыстацца беларускія спецслужбы для дзейнасці супраць нацыянальнай бяспекі Літвы. На карысць гэтай ацэнкі VSD прыводзіць некалькі абставін:

  • Відэа, якія выкарыстоўвае прапаганда. Відэа Скіндзерава з рэзкай крытыкай Святланы Ціханоўскай і яе офіса выкарыстоўвае беларуская дзяржаўная прапаганда. Дэпартамент міграцыі прызнае, што само гэта не даказвае свядомага супрацоўніцтва з рэжымам, але разам з іншымі звесткамі пацвярджае рызыку.
  • Канфлікты ў Вільні. 26 студзеня 2026 года ў віленскім бары Submarine Скіндзераў канфліктаваў з дарадцам Ціханоўскай Дзянісам Кучынскім, і відэа гэтага здарэння потым выкарыстала прапаганда. VSD згадвае таксама канфлікт 19 сакавіка, звязаны з прыездам вызваленых палітвязняў.
  • Сям'я ў Беларусі. Жонка Скіндзерава і іх непаўналетняе дзіця маюць дазволы на жыхарства ў Літве, але фактычна жывуць у Беларусі. З 2022 года жонка не менш за 23 разы прыязджала ў Літву з Беларусі. VSD бачыць у гэтым магчымы канал для кантактаў спецслужбаў са Скіндзеравым.
  • Сакрэтныя звесткі. Частка ліста VSD мае грыф «Сакрэтна», і ў рашэнні яе змест не раскрываецца.

Каментары12

  • Дзе першакрыніцы?
    04.11.2026
    А дзе першакрыніцы, адкуль гэтыя ўсе звесткі? Хачу прачытаць у арыгінале.
  • Юзік
    04.11.2026
    карач наступная
  • Игорь Николаев
    04.11.2026
    • Первая причина — это ты
    • А вторая — все твои мечты
    • Третья — это все твои слова, я им не поверил едва
    • Четвёртая причина — это ложь, кто прав, кто виноват — не разберёшь
    • А пятая причина — это боль от того, что умерла любовь

Цяпер чытаюць

На канцэрт Кадышавай у Мінску ў какошніках прыйшлі нават мужчыны83

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

Аргазм ёсць, а спермы няма. Што такое рэтраградная эякуляцыя і чым яна небяспечная11

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны83

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць