Свет22

Армія хакераў сусветнага класу Паўночнай Карэі — сакрэтная зброя, якая ўзламала Binance

Кватэра ў Пхеньяне, валютныя ўзнагароды і магчымасць ажаніцца з прадстаўніцай элітнай сям’і — так Паўночная Карэя заахвочвае сваіх найлепшых хакераў. Іх адбіраюць яшчэ ў школе і гадамі рыхтуюць да аперацый накшталт узлому крыптабіржы Binance, адкуль у кастрычніку скралі 6,3 мільярда даляраў, піша Reuters.

Фота: ЦТАК

ФБР і сама Binance абвінавацілі ў крадзяжы Паўночную Карэю. Кампаніі, якія расследуюць аперацыі з крыптавалютамі, звязалі ўзлом з паўночнакарэйскай групоўкай TraderTraitor. Пхеньян сваю датычнасць адмаўляе.

Былы выкладчык Кім Хын Гван, які рыхтаваў хакераў для дзяржавы, а ў 2004 годзе ўцёк у Паўднёвую Карэю, называе іх адной з таемных зброяў Кім Чэн Ына.

Паводле яго, улады сістэматычна шукаюць самых здольных дзяцей, каб ператварыць іх у выканаўцаў дзяржаўных аперацый. Жаданне саміх школьнікаў пры гэтым значэння не мае.

Штогод для паглыбленага вывучэння інфарматыкі адбіраюць прыкладна 150—200 дзяцей, пачынаючы з 11—12 гадоў. У 17 найлепшыя паступаюць у вядучыя ўніверсітэты краіны. Пасля новых адбораў толькі частка трапляе ў вайсковае кіберпадраздзяленне.

Акрамя вышэйшай матэматыкі і замежных моў, яны вывучаюць, як працуюць крыптавалюты, а таксама разбіраюць замежную тэхніку, каб разумець яе.

Тых, хто не становіцца хакерам, рыхтуюць да іншай працы: дыстанцыйна ствараць праграмы і дадаткі для заходніх кампаній, зарабляючы валюту для рэжыму.

Паспяховая аперацыя хакераў можа прынесці вайсковаму падраздзяленню да 30% скрадзеных сродкаў у далярах, расказвае Кім Хын Гван. Самі выканаўцы могуць атрымаць кватэру ў сталіцы, куды дазволяць перасяліцца і іх бацькам.

Паводле прафесара Карэйскага ўніверсітэта Лім Чон Іна, плошча такога жылля можа дасягаць 130 квадратных метраў. Сярод іншых прывілеяў — уступленне ў партыю, шлюбы з прадстаўнікамі ўплывовых сем’яў і паездкі ў дружалюбныя краіны, напрыклад Кітай.

Афіцыйна такіх спецыялістаў называюць навукоўцамі або даследчыкамі. Дзяржаўныя медыя не ўсхваляюць іх узломы, затое рэгулярна расказваюць пра таленавітых юных праграмістаў.

Паводле ацэнкі паўднёвакарэйскай разведкі за 2024 год, у кіберпадраздзяленнях КНДР працавалі каля 8400 чалавек.

Дзяржаўная падтрымка дае ім істотную перавагу. Як тлумачыць прадстаўнік аналітычнай кампаніі Chainalysis Алек Зебрык, звычайнаму кіберзлачынцу можа хапіць адной памылкі, каб яго знайшлі праваахоўнікі. Паўночнакарэйскія хакеры працягваюць працаваць і пасля поспехаў, і пасля правалаў: міжнародная супольнасць мае мала магчымасцяў іх спыніць.

Важную ролю ў іх працы адыгрывае штучны інтэлект. Ютубер Deeveeaar, які сцвярджае, што атрымаў доступ да камер назірання за паўночнакарэйскімі ІТ-працаўнікамі, называе ШІ асновай іх дзейнасці.

Паводле яго, яны карыстаюцца платнымі ChatGPT, Claude Code і Cursor, каб пісаць праграмы, перарабляць рэзюмэ, ствараць фальшывыя дакументы і асобы.

Сама Binance паведаміла, што для пранікнення ў камп’ютары супрацоўнікаў зламыснікі выкарысталі фальшывае сумоўе і шкоднасную праграму, схаваную ў рэкламе. Пасля яны скарысталіся ўнутраным інструментам штучнага інтэлекту, каб захапіць кантроль над сістэмамі.

Аднак прывілеі не азначаюць лёгкага жыцця. Былыя паўночнакарэйскія ІТ-працаўнікі расказвалі праваабарончай арганізацыі PSCORE пра працоўныя дні больш як па дзесяць гадзін, пастаяннае назіранне і жорсткія планы заробку ў далярах.

За невыкананне месячнай нормы пагражаюць прыніжэнні і іншыя пакаранні. Паводле кіраўніка PSCORE Бады Нам, ціск настолькі моцны, што ў людзей узнікаюць праблемы са здароўем.

Тым часам, адзначаюць аналітыкі, паўночнакарэйскія групоўкі ўсё часцей выбіраюць буйныя кампаніі з вялікімі запасамі сродкаў. Узламаць іх цяжэй, але прыклад Binance паказвае, наколькі вялікай можа быць здабыча.

Каментары2

  • Цікава
    08.11.2026
    Ааа, ці гэта рэклама КНДР ці антырэклама ўсей галіны кампутарнай бяспекі?
  • Мінак
    08.11.2026
    Я нешта прапусьціў? Калі гэта Binance зьнішчыць пасьпелі? памятаю толькі пра ўзлом.

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Усе навіны →
Усе навіны

УСУ ўдарылі па Крымскім мосце. Рух транспарту спынены15

Турысты накідалі ў фантан Трэві амаль на 200 тысяч еўра менш пасля таго, як падыход да яго зрабілі платным4

Кітайскі маркетплэйс Temu сам прапанаваў беларусцы супрацоўніцтва, але зліўся, калі даведаўся яе грамадзянства13

Мінабароны расказала, як над Беларуссю збіваюць заблукалыя дроны2

З Янам Памедорам Рэуцкім развіталіся ў Варшаве

Канкурэнт Starlink страціў 40 спадарожнікаў: ракета не даляцела да арбіты

Сабаленка адкацілася на трэцяе месца ў сусветным рэйтынгу

Сэрца — амаль адзіны орган, які не хварэе на рак. Навукоўцы пачынаюць разумець чаму1

Грэцкі агонь, антыкітэрскі механізм, сільфій ды іншыя страчаныя вынаходніцтвы. Чаму чалавецтва іх забыла?1

больш чытаных навін
больш лайканых навін

На канцэрт Кадышавай у Мінску ў какошніках прыйшлі нават мужчыны85

На канцэрт Кадышавай у Мінску ў какошніках прыйшлі нават мужчыны

Галоўнае
Усе навіны →

Заўвага:

 

 

 

 

Закрыць Паведаміць