Муж меркаванай кітайскай шпіёнкі Эліс Хуанг сам пазнаёміў яе з кіраўніком Nvidia
У шпіёнскім скандале вакол кіраўніка вытворцы перадавых чыпаў Nvidia Джэнсэна Хуанга новая пікантная дэталь. Як высветлілася, незвычайную ролю ў іх адносінах адыграў муж жанчыны, які таксама быў яе шматгадовым дзелавым партнёрам, піша The Wall Street Journal.

Кіраўнік Nvidia Джэнсэн Хуанг апынуўся ў цэнтры шпіёнскага скандалу пасля таго, як амерыканскія спецслужбы западозрылі яго блізкую знаёмую, кітайскую бізнэсменку Эліс Хуанг, у працы на разведку Кітая. Пазней ён прызнаў, што меў з ёй раман. Высветлілася таксама, што звязаная з Эліс кампанія Megaspeed закупіла амерыканскія чыпы на мільярды даляраў, нягледзячы на абмежаванні іх паставак у Кітай.
Цяпер The Wall Street Journal раскрыла новыя падрабязнасці гэтай гісторыі. У цэнтры ўвагі журналістаў апынуўся муж Эліс, кітайскі фінансіст Кан Вэй.
Ад інвестыцый у відэагульні да Nvidia
Кан Вэй, якому цяпер крыху больш за 50 гадоў, некалі быў вядомым у Кітаі кіраўніком інвестыцыйных фондаў. У 2010 годзе ён заснаваў кампанію Shanghai Hexi, назву якой можна перакласці як «гарманічны росквіт». З 2016 года, паводле карпаратыўных дакументаў, ён кіраваў ёю разам з Эліс.
Пара інвеставала ў самыя розныя галіны, ад распрацоўкі відэагульняў да фармацэўтыкі. Бізнэс быў пабудаваны на разгалінаванай сетцы кампаній, паміж якімі перадаваліся долі ўласнасці, і на асабістых сувязях, што дапамагалі знаходзіць новыя магчымасці для заробку.
Менавіта інвестыцыі ў гульнявую індустрыю дазволілі Кан Вэю яшчэ ў 2010‑я гады пазнаёміцца з Джэнсэнам Хуангам. У той час Nvidia была вядомая перадусім графічнымі працэсарамі для камп'ютарных гульняў. Паводле WSJ, з кіраўніком кампаніі Кан пазнаёміўся ў Азіі праз людзей з аднаго са сваіх інвестыцыйных праектаў.
Пазней Кан пазнаёміў з ім і сваю жонку. Калі менавіта гэта адбылося, журналісты не ўдакладняюць. Але з часам адносіны Эліс і Джэнсэна перараслі ў раман, які, як высветлілася, не быў таямніцай для яе мужа.
Паводле людзей, якія асабіста ведаюць пару, на працягу прыкладна двух гадоў Кан адкрыта гаварыў знаёмым пра блізкасць жонкі з кіраўніком Nvidia. Часам ён нават паўжартам называў яе асабістай памочніцай Хуанга. З яго паводзін складалася ўражанне, што ён прыняў гэтыя адносіны, хоць пра сапраўдныя пачуцці мужа журналістам нічога не вядома.
Як асабістыя сувязі дапамагалі новаму бізнэсу
У пачатку 2020‑х гадоў пара зацікавілася хмарнымі вылічэннямі, а затым і цэнтрамі апрацоўкі даных для штучнага інтэлекту. Калі ЗША ўвялі абмежаванні на пастаўкі перадавых працэсараў у Кітай, попыт на вылічальныя магутнасці за мяжой рэзка вырас.
У 2023 годзе Кан і Эліс набылі сінгапурскае падраздзяленне адной з кампаній, у якія раней інвеставалі, і перайменавалі яго ў Megaspeed. Эліс афіцыйна стала дырэктаркай, але, паводле WSJ, муж таксама непасрэдна ўдзельнічаў у развіцці бізнэсу.
Адным з ключавых партнёраў новага бізнэсу стала Alibaba. Кітайскаму тэхналагічнаму гіганту былі патрэбныя магутныя працэсары Nvidia, але амерыканскія абмежаванні перашкаджалі іх непасрэдным пастаўкам у Кітай. Таму Alibaba шукала кампанію, якая магла б пастаўляць ёй вылічальныя магутнасці з дата-цэнтраў за мяжой.
Megaspeed паведаміла Nvidia, што Alibaba стане яе буйным кліентам. Паводле крыніц WSJ, менавіта перспектыва такога супрацоўніцтва дапамагла сінгапурскай кампаніі ў лістападзе 2023 года атрымаць статус хмарнага партнёра Nvidia, а разам з ім і прыярытэтны доступ да дэфіцытных чыпаў.
Неўзабаве Эліс Хуанг расказала аднаму са знаёмых, што звязалася з кіраўніком Nvidia Джэнсэнам Хуангам і цяпер разлічвае на паспяховы старт бізнэсу Megaspeed.

Большасць набытых сервераў Megaspeed размясціла ў Малайзіі, адкуль прадавала вылічальныя магутнасці Alibaba. Але, як сцвярджаюць крыніцы WSJ, частку абсталявання кампанія пераправіла непасрэдна ў Кітай, у тым ліку шанхайскаму пастаўшчыку хмарных паслуг Century Litong. Яго ўладальнік раней меў дзелавыя сувязі з Кан Вэем.
Гэта магло парушаць амерыканскія экспартныя абмежаванні. Сама Megaspeed настойвае, што дзейнічае ў поўнай адпаведнасці з заканадаўствам.
Нягледзячы на рызыкі, муж і жонка працягвалі шукаць інвестараў. Паводле суразмоўцаў WSJ, у 2024‑2025 гадах яны прапаноўвалі ўкласці грошы ў некалькі новых дата-цэнтраў у Паўднёва-Усходняй Азіі і Шанхаі. Патэнцыйным партнёрам абяцалі магчымасць патроіць укладзеныя сродкі за тры гады і запэўнівалі, што маюць спосабы дастаўляць чыпы Nvidia ў Кітай.
Цяпер праблемы ва ўсіх
На фоне расследавання паставак амерыканскіх працэсараў пад увагу праваахоўных органаў трапілі і Эліс, і Кан.
Як высветліла The Wall Street Journal, раней у 2026 годзе Кан Вэя затрымалі ў Шанхаі ў межах расследавання магчымых маніпуляцый з акцыямі кампаній, якія гандлююцца на біржы. Нядаўна яго вызвалілі.
Эліс тым часам забаранілі ўезд на Тайвань, дзе яна неаднаразова сустракалася з Джэнсэнам Хуангам. Мясцовыя ўлады правяраюць, ці маглі яе паездкі быць звязаныя са зборам разведвальнай інфармацыі.
ЗША і Сінгапур таксама працягваюць расследаваць дзейнасць Megaspeed. Пекін адхіляе паведамленні пра магчымую працу Эліс на кітайскія спецслужбы.
Сам Джэнсэн Хуанг прызнаў пазашлюбную сувязь з Эліс і папрасіў прабачэння ў сям'і і супрацоўнікаў Nvidia. Пазней ён пакінуў пасаду генеральнага дырэктара Nvidia.
Ні Кан Вэй, ні Эліс Хуанг не адказалі на просьбы журналістаў пра каментарый.
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал
Каментары