У Беларусі пачалася працэдура банкруцтва найстарэйшай бізнэс-школы краіны «Тут і цяпер». Эканамічны суд Мінска адкрыў адпаведную справу паводле заявы падатковай інспекцыі Першамайскага раёна сталіцы, заўважыла выданне Office Life.

Паводле звестак Адзінага дзяржаўнага рэестра даных аб банкруцтве, запазычанасць установы перад бюджэтам перавышае 813 тысяч рублёў.
Бізнэс-школа працавала з 1995 года і ўваходзіла ў аднайменную кансалтынгавую групу — адну з найбольш вядомых у Беларусі. У найбольш паспяховы перыяд яна прапаноўвала больш за 100 адукацыйных праграм для кіраўнікоў і супрацоўнікаў кампаній. Навучанне ахоплівала менеджмент, маркетынг, кіраванне персаналам, фінансы, продажы, лагістыку і іншыя кірункі.
Фінансавыя праблемы ў школы пачаліся год таму. У кастрычніку 2025 года ўладальнікі вырашылі яе ліквідаваць, аднак нявыплачаная запазычанасць перад бюджэтам не дазваляе зрабіць гэта ў звычайным парадку. Таму кампаніі давядзецца прайсці праз працэдуру банкруцтва.
Суд прызначыў часовага кіраўніка, які павінен яшчэ раз праверыць, ці ёсць у даўжніка маёмасць, удакладніць спіс крэдытораў і падаць сабраную інфармацыю на наступным судовым пасяджэнні. Яно прызначанае на 22 лютага.
З 2022 года статус бізнэс-школы ў Беларусі з’яўляецца дзяржаўным. Яго прысвойвае Міністэрства эканомікі. Першай арганізацыяй, якая атрымала такі статус у 2025 годзе, стала Акадэмія кіравання пры Лукашэнку.
Цяпер у Беларусі налічваецца шэсць афіцыйных бізнэс-школ. Апошняй, у жніўні 2026 года, гэты статус атрымала РУП «Вытворчае аб’яднанне «Беларуснафта».
Каментары